Farashin Man Dizel Ya Yi Tashin Gwauron Zabo A Nijeriya Abin Da Zai Ƙara Tsadar Kayayyaki

Mar 12, 2022 - 02:51

0 81

Farashin Man Dizel Ya Yi Tashin Gwauron Zabo A Nijeriya Abin Da Zai Ƙara Tsadar Kayayyaki

Wani ƙusa a ƙungiyar dillalan Man Fetur mai Zaman Kanta ta Ƙasa, IPMAN, Chinedu Anyaso ya yi gargaɗi cewa ƙarin farashin man dizel zai haifar da hauhawar farashin kayaiyakin masarufi a ƙasar nan.

Anyaso, wanda shi ne Shugaban masu harkar rumbunan man fetur (depot) na Enugu, ya baiyana hakan ne a yayin tattaunawa da Kamfanin Daillancin Labarai na Ƙasa, NAN a Awka.

Ya baiyana cewa ƙarin farashin babbar matsala ce domin zai ƙara wa ƴan ƙasa raɗaɗin zafin rayuwa.

NAN ya rawaito cewa farashin man dizel ya tashi a makonni biyu da ga N400 zuwa N650 a Awka.

Sabo da rashin tsayayyar wutar lantarki a kasa, man dizel ne abin amfani a injina a manya-manyan guraren al'umma kamar su kamfanunuwa, otal-otal, masana'antu da sauran su.

Ya ce halin da a ke ciki ba mai dadi ba ne ga IPMAN da ma harkar kasuwanci a ƙasa baki ɗaya.