Ɗan takarar gwamnan jihar Sokoto a ƙarƙashin jam’iyyar ADC, Hon. Manir Muhammad Dan’iya, ya yi All-wadai da rahotannin dake cewa an riƙe albashin watan Satumba na 2026 na wasu malamai da ma’aikatan hukumar Ilimin Kananan Hukumomi (LGEAs) a kusan ƙananan hukumomi 23 na jihar, bisa zargin cewa sun shiga harkokin siyasa na goyon bayan ADC.
Dan’iya ya yi kira ga gwamnatin jihar Sokoto da ta gudanar da bincike tare da tabbatar da cewa babu wani ma’aikacin gwamnati da aka hana albashinsa na halal saboda ra’ayin siyasa ko jam’iyyar da yake goyon baya.
A cikin wata sanarwa da mai taimaka masa kan harkokin yaɗa labarai, Aminu Abdullahi, ya sanya wa hannu, Dan’iya ya ce wasu bayanai da tawagarsa ta samu sun nuna cewa an ware wasu malamai da masu kula da makarantu waɗanda suka halarci wani gangamin nuna goyon baya ga ɗan takarar ADC.
Ya ce ana kuma zargin cewa wasu Sakataren Ilimi na ƙananan hukumomi sun bayyana cewa suna aiki ne bisa “umarni daga sama”, tare da cewa ba za a iya biyan albashin ba ko da hukumomi irin su hukumar Yaƙi da Cin Hanci da Rashawa (EFCC) ko Hukumar Yaki da Cin Hanci da Rashawa da sauran Laifukan da ke da alaƙa (ICPC) sun shiga lamarin.
Dan’iya ya ce zarge-zargen na da muhimmanci kuma suna buƙatar gudanar da bincike mai zaman kansa, gaskiya da adalci, yana mai neman gwamnatin jihar ta bayyana matsayarta tare da fayyace tushen doka da aka dogara da shi wajen riƙe albashin ma’aikatan da suka gudanar da ayyukansu.
