YANZU-YANZU 💥: ADC TA ƊAUKAKA ƘARA KAN HUKUNCIN KOTU, TA GARGAƊI INEC KAN ƊAUKAR WANI MATAKI
Jam’iyyar (ADC) ta shigar da ƙarar ɗaukaka kara kan hukuncin da Babbar Kotun Tarayya da ke Abuja ta yanke a ranar 5 ga Nuwamba, 2026, kan rikicin shugabancin jam’iyyar da ya shafi Hon. Nafiu Bala Gombe.
Haka kuma, jam’iyyar ta shigar da buƙatar dakatar da aiwatar da hukuncin har sai Kotun Ɗaukaka Ƙara ta saurari ƙarar tare da yanke hukunci a kanta.
A cikin wata sanarwa da Daraktan Yaɗa Labarai da Sadarwa na Dabaru na Majalisar Yaƙin Neman Zaɓen Shugaban Ƙasa ta ADC, Phrank Shaibu, ya fitar a ranar Juma’a, 6 ga Nuwamba, 2026, jam’iyyar ta bayyana cewa ta sanar da Hukumar Zaɓe Mai Zaman Kanta ta Ƙasa (INEC) a hukumance game da ɗaukaka ƙarar da kuma buƙatar dakatar da aiwatar da hukuncin.
ADC ta buƙaci INEC da ta yi taka-tsantsan tare da kauce wa ɗaukar duk wani mataki da zai iya shafar shari’ar da ke gaban Kotun Ɗaukaka Ƙara, tana mai cewa har yanzu kotu ba ta yanke hukunci kan buƙatar dakatar da aiwatar da hukuncin ba.
Jam’iyyar ta kuma jaddada cewa ya kamata INEC ta mutunta tsarin shari’a tare da bai wa kotun damar sauraron ƙarar da kuma yanke hukunci ba tare da wani mataki da zai iya kawo cikas ga tsarin ba.
A cewar sanarwar, ADC za ta yi amfani da dukkan hanyoyin da doka ta tanada domin kare haƙƙinta, tana mai kira ga ’ya’yanta da magoya bayanta da su kwantar da hankalinsu, su ci gaba da kasancewa masu ƙarfin gwiwa.
Haka kuma, jam’iyyar ta bayyana cewa hukuncin kotun ba shi ne ƙarshen tafiyarta ta siyasa ba, inda ta tabbatar da cewa za ta ci gaba da shirye-shiryen siyasa da yaƙin neman zaɓenta na 2027 duk da ƙalubalen shari’ar da take fuskanta.
ADC ta kuma ce za ta ci gaba da isar da saƙonninta ga ’yan Najeriya, musamman kan manufofinta na rage tsadar rayuwa da inganta rayuwar al’umma, yayin da take ci gaba da ƙalubalantar hukuncin kotu ta hanyar da doka ta tanada.
A ƙarshe, jam’iyyar ta bayyana fatanta na ganin an yi adalci, tare da tabbatar da cewa za ta ci gaba da bin tsarin shari’a domin kare haƙƙinta da kuma damar ’yan Najeriya na zaɓen shugabannin da suke so.
