Sojoji sun kama dan bindigar da ake zargi da hannu a kisan Sarkin Gobir
managarciya
Sojojin runduna ta1 ta sojojin Najeriya sun kama Bako Wurgi, wanda aka fi sani da Baka NaGarba, wanda ake zargi da zama shugaba kuma dillalin makamai ga 'yan fashi masu tayar da hankali.
Ana zarginsa da hannu a kisan Isa Bawa, Sarkin Gobir na jihar Sakkwato.
A watan Yuli, an yi garkuwa da basaraken gargajiya daga Kwanar Maharba a Sakkwato yayin da yake dawowa daga wani taro, kuma an kashe shi makonni uku bayan haka.
A wani faifan bidiyo da ya bazu, an nuna basaraken an daure shi a hannun 'yan fashi yana rokon gwamnatin jihar da ta biya kudin fansa domin a sake shi.
A cewar Zagazola Makama, wata mujalla da ke mai da hankali kan yaƙi da 'yan ta'adda a yankin Tafkin Chadi, an kama wanda ake zargin ya shirya sace basaraken a ranar 14 ga Disamba da misalin karfe 10 na dare, bayan samun rahoton sirri cewa yana karbar magani a wani asibiti a garin Shinkafi, jihar Zamfara.
Rahoton ya bayyana cewa Wurgi yana samun magani ne saboda raunukan da ya samu yayin wata arangama da wata tawagar abokan gaba, inda sojojin suka gano yana hanyarsa zuwa asibiti tare da raunuka masu yawa da harbin bindiga.
