Bagudu ya aika sunayen Shugaba da mambobin hukumar zabe ga majalisar dokokin jiha

Sep 15, 2021 - 18:17

0 55

Gwamnan jihar Kebbi Sanata Abubakar Atiku Bagudu a ranar Talata ya aikawa majalisar dokokin jihar sunayen shugaba da mambobinsa da yake son a tantance a kuma tabbatar domin su jagoranci hukumar zabe mallakar jiha.

A takardar da ya tura wadda mai baiwa gwamna shawara kan yada labarai Yahaya Sarki ya rabawa manema labarai a birnin Kebbi ya ce sunayen sun hada da Aliyu Muhammad Mera a matsayin shugaba, sai Ahmed Amadu Nasani, Mustapha Usman Ka'oje, Honarabul Aliyu Ahmed Adamu da Honarabul Sa'idu Moh'd Dankolo, dukansu mambobi ne a hukumar zaben.

Bagudu ya ce zabar mutanen yana kunshe ne a cikin daftarin doka sashe na 198 da kundin tsarin mulki wanda aka yiwa gyaran fuka a 1999.

Bagudu ya ce ya nada mutanen ne domin su taimaka masa ga hakkin da doka ta daura masa.