Daga Aminu Abdullahi Gusau.
Rundunar ’Yan Sandan Jihar Zamfara ta samu nasarar kai samame tare da tarwatsa wata fitacciyar maboyar mambobin haramtacciyar ƙungiyar Yan Sa Kai da ke yankin Gidan Dawa, Ƙaramar Hukumar Gusau, biyo bayan makonni da jami’an Sashen Leken Asiri na Jiha (SID) suka shafe suna gudanar da sa ido na musamman cikin ɓoye.
An dade ana sanya ƙungiyar a ƙarƙashin kulawa bayan gano cewa tana da hannu wajen aikata wasu laifuka a cikin birnin Gusau da kewaye, waɗanda suka haɗa da taruwar jama’a ba bisa ƙa’ida ba, mallakar makamai ba bisa ƙa’ida ba, da kuma muzgunawa, tsoratarwa da kai wa wasu al’umma da ba su ji ba su gani ba hari. Waɗannan ayyuka sun zama abin damuwa da kuma haifar da tashin hankali a tsakanin jama’a.
Bisa sahihan bayanan sirri da aka samu, jami’an SID tare da haɗin gwiwar rundunonin musamman na rundunar ’yan sanda sun kai samame maboyar ƙungiyar da ke Gidan Dawa a ranar Litinin, 31 ga Agusta 2026, da misalin ƙarfe 5:30 na yamma.
An kai samamen ne da nufin cafke jagoran ƙungiyar, Isiya M., wanda aka fi sani da “Giwa”, tare da wasu makusantansa. Da ’yan sanda suka isa wurin, waɗanda ake zargin sun yi ƙoƙarin tunkarar jami’an, amma jami’an suka yi galaba a kansu cikin gaggawa. Wasu daga cikin waɗanda ake zargin sun tsere, inda suka bar wasu kayayyaki a wurin saboda gaggawar tserewa.
Kayayyakin da aka kwato tare da sanya su cikin jerin abubuwan da aka samu a matsayin shaidu sun haɗa da:
Babura Boxer guda shida (6)
Bindigogi ƙirar gida biyu (2)
Sanduna
Tabarmi guda biyu (2)
Kwamishinan ’Yan Sandan Jihar Zamfara, CP A.M. Bello, psc+, MNIPS, CCNP, ya tabbatar wa al’ummar jihar Zamfara cewa rundunar za ta ci gaba da bin sawun waɗanda suka tsere domin cafke su da gurfanar da su a gaban doka.
Ya kuma jaddada cewa rundunar ba za ta lamunci duk wani nau’in haramtaccen aiki da ƙungiyar Yan Sa Kai ko wasu masu aikata laifuka ke gudanarwa ba.
DSP Yazid Abubakar, ANIPR
Jami’in Hulɗa da Jama’a na ’Yan Sanda (PPRO)
A madadin: Kwamishinan ’Yan Sandan Jihar Zamfara
Gusau.
