'Yan Sanda Sun Kama Wata Mata Dauke Da AK-47 Da Aka Boye A Cikin Buhun Garri
managarciya
Daga: Abbas Yakubu Yaura.
Wata mata mai suna Hauwa Yusuf, ‘yar shekara 30, ta shiga hannun jami’an ‘yan sanda na musamman saboda boye bindiga kirar AK-47 guda daya da kuma mujallun AK-47 guda hudu a cikin buhun garri.
An damke matar ne a kan hanyar Abuja zuwa Kaduna a wani samame da aka kai mata.
Muyiwa Adejobi, kakakin rundunar ‘yan sandan, ya yin da yake gabatar da wadanda ake zargin a hedikwatar STS da ke Abuja a ranar Juma’a ya bayyana cewa, “Yusuf ta bayyana cewa, wani dan bindiga da ya yi kaurin suna a jihar Katsina, Aminu Basullube, ya aike ta da ta dauko makaman a unguwar Madam Camp dake unguwar Danum a jihar."
Adejobi ya ce, a ranar 14 ga watan Agusta, 2024, bisa bayanan sirrin da muka samu, jami’an STS sun kama wata Mata Hauwa Yusuf ‘F’ mai shekaru 30 a karamar hukumar Dutsin-Ma ta jihar Katsina, inda ya kara da cewa an kama wanda ake zargin ne a lokacin da take kan hanyar wucewa daga Lafia, jihar Nasarawa zuwa Katsina, cikin wata motar bas ta Sienna dake kan hanyar Abuja zuwa Kaduna.
Ya bayyana cewa an gudanar da cikakken bincike tare da kwato bindiga kirar AK-47 guda daya da kuma mujallu AK guda hudu da aka boye a cikin farin buhun Garri daga hannun wanda ake zargin.
A cewarsa, ya yin da ake yi mata tambayoyi, wadda ake zargin ta amsa cewa, wani dan bindiga mai suna Aminu Basullube, wanda ya yi kaurin suna wajen ta’addanci a jihar Katsina, ya aike ta da ta dauko makaman a sansanin Madam Danum na jihar Katsina.
