Yadda Za Ki Hada Burabuskon Gero Mai Dadin Gaske
managarciya
BURABUSKON GERO
Daga Aisha Bashir Tambuwal
Masu bibiyarmu a sashen girke-girke a wannan kafar MANAGARCIYA ina muku lale marhaban da sake haduwa da mu. A wannan na kawo muku yanda ake hada BURABUSKON GERO.
Abin da za a tanadar:-
1: Gero,
2: Man girki,
3: Gishiri,
4: Ruwa.
Da farko mace za ta dauko Geronta ta surfa ko ta ba da a surfo mata shi, sai ta fidda dussa ki akai inji a yi barzo, a tankade shi ta fidda gari, sai ta yi aiki da tsakin, daga nan ta dora ruwa madaidaita a tukunya ta yi madambaci, a dauko tsakin a yayyafa ruwa da dan mai da gishiri a cakude shi sosai , ta zuba a tukunyar da tayi madambaci. ki tabbata kin rufeshi sosai yanda zai turara sosai, ki bashi a kalla minti 30, sai ki sauke ki sake yayyafa ruwa sosai amma kada ki bari tsakin ya jike , sai ki kara zuba mai da gishiri kadan (ka da ki bari gishiri yayi yawa) ki juya shi sosai ki maida shi kan wuta ki koma turara shi, (kina iya yanka albasa ki saka idan kina bukata) ki dan bashi lokaci da ya dafu za ki ji kamshinsa na tashi idan ki ka taba shi za ki ji yayi taushi, sai ki sauke, ki zuba a foodflask.
Anayin na masara kuma ana na shinkafa kuma yanda ake yin wannan haka ake yin sauran, za ki iya yiwa maigida wannan ha]in da mai da yaji ko ki soya mai da tarugu ki saka kayan dandano ko ki yi da miyar taushe ko miyar ganye.
DANTSOKACI:-
Iya kalolin girke-girke yana daya daga cikin abubuwan da mata suke jan hankain mazajensu da shi, matukar ki ka iya nau'ukan girke-girke kala kala masu dadi za ki ga mijinki yana kara sonki kuma ba zai dinga cin abincin titi ba duk inda yake yana mararin ya dawo gida, ba shi babu zaman majalisa, dan haka 'yan uwana ku yi kokari ku dage wajen iya kalolin girke-girke.
