Sabuwar Dokar Haraji: Lagos na shirin Bautar da Arewa---Kwankwaso
managarciya
0
65
Dan takarar shugaban kasa na jam'iyyar NNPP a 2023, Sanata Rabiu Musa Kwankwaso ya yi ikirarin cewa ana shirin yi wa Arewa mulkin mallaka daga Legas.
Kwankwaso ya yi wannan zargin ne a lokacin da ya ke gabatar da jawabi yayin taron dalibai na jami'ar Skyline a Kano, inda ya yi tsokaci kan takaddamar masarautar jihar.
Jaridar Daily Trust ta rahoto Kwankwaso ya ce akwai matsaloli da yawa a Arewa, kamar rashin tsaro, yunwa, talauci, cututtuka da sauransu.
A cewarsa, an mayar da sarkin Kano tamkar wani 'abin wasa' a yayin da Arewa ke fama da wadannan matsalolin.
Kwankwaso ya kuma yi ikirarin cewa akwai shirin da ake yi daga Legas na kakaba wanda suke so matsayin sarkin Kano da kuma bautar da jama'ar yankin.
“A yau, muna iya gani a sarari cewa akwai yunƙuri da yawa daga ɓangaren Legas domin yin mulkin mallaka a wannan yanki na ƙasar.
"Yau, Legas ba za ta bar mu mu zabi sarki ba, wai Legas ce za ta zo har tsakiyar Kano domin nada nasu sarkin.”
Tsohon gwamnan jihar Kanon ya caccaki Legas kan karbar harajin 'yan Arewa inda ya yi ikirarin matasa daga Legas na aiki tukuru domin kwashe albarkatun Kano.
The Cable ta ce Kwankwaso ya nuna damuwa cewa harajin da ake karba daga rijistar wayoyin 'talafon' a jihar Kano da Arewacin kasar suna karewa ne a hannun 'yan Legas.
A cewarsa, masu zuba jari a Arewa na samun matsin lamba domin su mayar da hedikwatar kamfanoninsu da bankunansu zuwa jihar Legas, wanda ke nufin kai arziki can.
Ya yi kira ga 'yan majalisu daga Arewa da su tabbatar da cewa ba a tauye hakkin shiyyar ba, tare da kasancewa masu sa ido kan dokokin da ake kafawa a kasar.
A wani labarin, mun ruwaito cewa Sanata Rabiu Musa Kwankwaso ya bukaci shugabanni su yi aiki tukuru domin gyara matsalolin Najeriya.
Kwankwaso ya ce rashin tsaro, tabarbarewar tattalin arziki da kuma ƙarancin ababen more rayuwa, musamman wutar lantarki, sun zama matsalar Arewa.
