Mataimakin gwamnan jihar Kano ya ajiye aikinsa, kamar yadda wata sanarwa daga ƙungiyar Kwankwasiyya ta bayyana a ranar Juma’a.
A cikin sanarwar da mai magana da yawun ƙungiyar, Dakta Habibu Sale Mohammed, ya sanya wa hannu, an ce matakin murabus ɗin ya zo ne duk da wahalarsa, domin kare muradun al’umma da kuma tabbatar da daidaito a harkokin mulki a jihar.
Sanarwar ta bayyana cewa wasu al’amura na baya-bayan nan sun takaita ikon mataimakin gwamnan wajen gudanar da cikakken aikinsa yadda ya kamata, lamarin da ya sa ya zama dole a ba ofishin damar yin aiki yadda ya kamata domin amfanin jama’a.
Sai dai ƙungiyar ta jaddada cewa murabus ɗin ba ya nufin amincewa da zarge-zargen da Majalisar Dokokin Jihar Kano ta yi masa. Ta ce mataimakin gwamnan na nan kan bakansa na rashin laifi, yana mai cewa aikinsa a baya ya nuna gaskiya da jajircewarsa wajen yi wa al’umma hidima.
Ƙungiyar ta bayyana matakin a matsayin nuna kishin ƙasa da siyasa mai nagarta, tare da nufin tabbatar da zaman lafiya da kauce wa rikice-rikicen da ka iya kawo cikas ga cigaba da gudanar da mulki a jihar.
Bayan murabus ɗin, ana sa ran tsohon mataimakin gwamnan zai karkata hankalinsa kan ayyukan siyasa a cikin ƙungiyar Kwankwasiyya, musamman wajen ƙarfafa tsarinta da kuma shirye-shiryen tunkarar zaɓen shekarar 2027.
Ƙungiyar ta kuma buƙaci magoya bayanta da al’ummar jihar Kano da su kasance masu bin doka da oda tare da ci gaba da mara wa kyakkyawan shugabanci da dimokuraɗiyya baya.
Ta ƙara da cewa za a fitar da ƙarin bayani kan lamarin a nan gaba.
