A Laraba data gabata ne kamfanin siminti na BUA ya mikawa al’ummar Gidan Boka da ke Ƙaramar Hukumar Wamakko a jihar Sakkwato wani asibiti da makaranta da masallaci, da kudinsu ya kai Naira miliyan 275.
Kamfanin ya damƙa gine-ginen, wanda tuni aka kammala, har da tagomashin ton 170 na siminti ga al’ummomi 68 a karamar hukumar.
Manajan Daraktan Kamfanin Simintin na BUA, Yusuf Binji, ya ce wannan karamcin wani bangare ne na alhakin yi wa al’ummar da kamfanin ya ke alheri.
Banji, wanda Daraktan Ma’aikata na BUA, Altine Wali ya wakilta, ya ce kamfanin ya gudanar da aikin samar da matsugunan ne a wani bangare na shirin fadada katafaren gini, tare da share filaye a cikin al’ummar Gidan Boka da kuma raba filaye ga iyalan da abin ya shafa.
Da yake jawabi, shugaban gudanarwa da ayyuka na kamfanin, Sada Suleiman, ya ce kamfanin ya kuma gina tituna, da kuma samar da makabarta, ruwan bututu da wutar lantarki ga al’umma.
Ya ce, kamfanin ya tabbatar da shirin raba siminti ga al’umma domin gyara masallatai da sauran ababen more rayuwa, da kuma samar da magunguna da sauran kayayyakin masarufi ga ‘yan kasa a cikin al’ummomin yankin.
“Kamfanin Simintin BUA yana tallafawa al’ummomin a fannin kiwon lafiya, horar da basira, samar da guraben karatu da kayan ilimi,” in ji shi.
managarciya
